عانس، فاشلة ، انا مش هجوز

انا واحدة عندى أربعين سنة مثقفة ناجحة .. عندى شركتى الخاصة وزى ما بيقولوا كدا "عملت من ولا حاجه حاجه وابتديت من الصفر " والحمد لله جميلة أنيقة وبحب ألبس ماركات عالمية (طبعاً انا الوقتى بعلو فى نظركو وفيكو ناس نفسها تبقى زى وتستفيد من خبرتى)طيب ممكن أبتدلكو تانى من الأول ؟!!

أنا واحدة عندى أربعين سنة جميلة وعانس .
- ايه عانس ؟!!  :(
طبعاً نظرتكو الوقتى أتغيرت تجاهى خااالص حتى لو بعد كدا هكمل وأقول وناجحه وعملت لنفسى مستقبل وكل الشغل ده .. هيبقى الكلمة الوحيده الى فى بالكو الوقتى (يعينى .. بجد صعبت عليا )

طيب لو قلتلك ان ده كان أختياري

_ أكيد بتقول كدا عشان منشفقش عليها

لاء بجد ده كان أختياري

_ أكيد ندمتى بعد كدا

لاء مندمتش أنا اسمى سعاد وانا شابة كان دايماً عندى اراء مختلفة فى الحب .. كنت دايما بشوف الى حواليا الى جربو الحب بيشتكو منو والى مجربهوش بيدورو عليه دايماً وبيشتكو من غيابه وعمرى مفهمت العلاقة؛ اسمع ماما تدعى على اليوم الى أتجوزت بابا فيه والى جبتنا لدنيا دى ، وأسمع أختى بتشتكى من خطيبها انو مبيهتمش وبيكلم بنات تانية ولسه معاه .. واسمع صحبتى بتكلم على حبيبها وهى بتعيط الزاى بيعملها بالاسلوب ده وايه الى عملتو غلط عشان العلاقة تنتهى .
ومن جانب اخر بشوف هبل وعبط كل الى حواليا كنت بشوف اصحابى الى رجالتهم تضربهم وتزعقلهم ويكملو بردو فى العلاقة .. او يهينها ويتعدى على حريتها وتقولى عادى "مهو الراجل "
كنت بستغرب اوووى لما اسمع اخويا يكلم صحبو فى التليفون ويقولو "يابنى ادلها فوق دماغها هتلاقى ديلها هيتعدل هما كدا الستات تسيبلهم الحبل يأرطسوك " 

فى كل الظروف المحيطه بيا دى عارفه انكو هتقولوا "أكيد اتعأدت من الى حواليها ، ياحرام "؛ بالعكس قلت أنا هكون مختلفه ولما الاقى الانسان الى انا هحبو هنتعامل بطريقة مختلفه .. وفعلا حبيت واتخطبت وحاولت على قدر الامكان انى اتعامل بالحق والحب والوفاء وكل المبادئ السامية الى احنا قرينا عنها فى الكتب وكان الى حد ما مُتفتح بالرغم انو سعات قالائيه بيطلب طلبات غريبه او بيؤمر

" امسحى الولد ده"

 "ليه ده ابن عمى "

" مش عاجبنى"     لما اقول لصحابى يقولولى " حقو مش هو الراجل " بس مش ده الى خلانى كدا ؛لاء
انا كنت بحس انى دايماً لما بكون لوحدى مع اصحابى بين كتبى وعلمى دايماً بيكون اسعد لما اكون بحريتى .. عشان كدا قررت انهى العلاقة وتوصلت لقرار غيرلى حياتى كلها " انى انا مش هجوز "
بدأت أكمل دراستى ، بدأت أقرأ كتييير ، أتثقف ، بدأت أسافر واخد علم من بلاد برده كونت صدقااات كتير اوووى وناس فى بلاد بره اقتنعو جدا بفكرتى عن الزواج والحب .. وكنت فى قمة نجحاتى وكنت فخورة بنفسى جداً ومميزه عن بقيت الناس

ومميزات انى مكونتش متجوزه :-

• أصحى فى الوقت الى أنا عايزاه
• أنام فى الوقت الى أنا عايزاه 
• اكل وقت م انا عايزه .. عايزه اتغدى او متغداش اتعشى متعشاش ، عايزه اكل بره النهارده ، مش عجبانى اكله مكلهاش مش لازم اكلها عشان هو بيحبها 
• أخرج مع اصحابى برحتى ونضحك من غير هموم او لازم ارجع الساعه كام عشان اخد بالى منو
• ومميزات تانيه كتيييييير وأهمها "الحرية"

وفعلاً أشتريت عربية احدث موديل جبت هدوم كتير .. قتحت خط ازياء بجانب شركتى "حاجه تانيه بحبها " جبت شقه عملت ديكورتها غريبه ومختلفة .. 

"انا كنت سعيدة "

وأول لما دخلت حدود مصر ورجعت لأهلى وناسى والناس اصحابى كل نجحاتى أستبدلوها بكلمة واحده 

"عانس "

 نسو اد ايه انا تعبت عشان اوصل للمكانه الى انا فيها دى وكلهم شافونى مجرد انسانه فاشله واسمعو التعليقات :-

• بصو كل الحاجات الى عملتها فى بلاد بره دى تخبى بيها خيبتها التقيله انى ملقتش حد يرضى بيها
• طبعا هتلاقو راجل ايه يرضى بيها وهى ماشيه على حل شعرها فى بلاد بره شغل ايه وبتاع ايه للست
• الست ملهاش الا بيتها وعيلها هى اعترضت على سنة الحياة أقطعلكو دراعى منها ان مكنتش بتاخد علاجات اكتئاب متفهمونيش ان هيا كدا سعيدة
• انا بنتى لو فكرت تكمل تعليمها بعد الجامعه او تنزل تشتغل كنت اقطعت رجليها ليه مشفتوش سعاد الوقتى بقت عامله الزاى بتتحسر على اليوم الى كانت بترفض فيه العرسان 
• وحاجات غير دى كتيييييييير

وأنا كل لما أفهمهم انى سعيدة والله العظيم انا مكنت سعيدة فى حياتى اكتر من دلوقتى يقولى "اكيد هتقول كدا يعنى امال هتقول انى هى نفسها تتجوزى وان هى تعيسة فى حياتها " والمجتمع كل المجتمع بقا شايفنى

 "عانس "

وطبعا صحباتى المصريات بقو يتفادو انهم يتكلمو عن ازواجهم وعن حبيبهم قدامى احتراماً لمشاعرى عشان "متجرحش " واكتشفت اد ايه الناس والمجتمع دماغو متبرجمه على ان الست من غير بيتها وجوزها لا تساوى شيئ وان الست ملهاش شغلانه الا كدا وبس .
ووصلت لمرحلة انى أنا الى بدأت "أشفق عليهم " لأنى أكتشفت ان كل واحده من اصحابى بدأت تتدخل فى مرحلة اليأس المبكر بدأت تهمل شكلها وحطت حياتها كلها لخدمة اطفالها وجوزها وبس والى كانو متفوقين فى المدرسة وكنت بدعى ربنا لو يدينى 1% من ذكائهم بقم "ربات بيوت مقيتات " ميعرفوش الا "شهقة الملخية " ..

وسابو حياتهم وممكن كمان يكون قصروا فى حق ربنا .. وحياتهم كلها تمحورت حول البيت .. عشان دورو على الى المفترض يعملوه هما اتربو على كدا "من بيت ابوها لبيت جوزها للمقبرة " وفى الوقت الى بدأ يطلعلهم تجاعيد انا حياتى كانت لسه فى أولها .. 

* أنا تركت مجتمعى الى شافنى "عانس فاشلة " محققتش اى حاجه فى حياتها وأعده من غير ولا جوز ولا بيت ، أنا الوقتى اعده فى مجتمع شاف دور المرأة اكبر من كدا بكتير والحياة الزوجيه هى جزأ من حياتها ولست كلها .. انا مش ضد الزواج انا ضد التخلف والجاهلية .. أنا كل يوم بكبر عن اليوم الى قبلو "عملياً وربانياً وعلمياً واجتماعياً " وبحمد ربنا انى من 20 سنه فاتت اتخذت قرار
"انا مش هجوز "

#أهداء الى صديقتى "ايه " ومحدش يعمل تحليلات عبقرية ويقول "ايه " تبقى "سعاد " ^_^